圖：主場新聞
近日民主黨又烽火連連，今次燒到去呢個新當選既「新丁」胡志偉。話說佢第一日返立法會，就上載一張踩單車轉入立法會英姿的靚仔照。話當選後會買返架新單車，如果有活動往來港島都會踩單車咁話。此話一出，立即引來喺選舉期間話要做「首位踩單車返立法會」既議員龐一嗚挑機，話要下星期三喺佢地頭富山等，帶佢踩單車返立法會咁話。胡志偉都無示弱，立即反擊話自己係九龍一向用單車往來，不過立法會事忙，所以先會坐公共交通過去，又拋返個波俾龐一嗚，約佢星期日喺志蓮淨苑等，話要帶佢單車一遊九龍東咁話。
胡志偉背負住「民主黨」既原罪，呢單嘢一出即刻引來多方圍攻，有人話「胡志偉做騷太明顯，照片由第三者拍攝，太有擺拍的味道，又特地選在立法會返工第一天。」最多人好似龐一嗚咁話佢，「如果你只是帶單車上地鐵，去到金鐘才踩兩下，請你收手吧，或者不要再標榜自己在推廣什麼低碳生活。」八方初初睇呢單嘢一時眼花，以為d人係鬧緊民主黨唔夠民主，又入中聯辦同阿爺談判咁，睇真d先知原來喺講緊單車。不過兩者既邏輯係相通既，大家都係喺度拗緊邊個先係「真民主派／真單車派」，就算佢依家話支持，點知佢幾時「出賣民主／單車架！」
八方利益申報，八方都唔同意民主黨在政改方案投贊成票。不過八方都要講返句公道說話，八方識唔少九東人都知胡志偉一向以單車代步，選舉期間八方都親眼見過胡志偉踩單車上竹園拉票。龐一嗚全以單車代步，固然值得尊敬，但洗唔洗去到同胡志偉挑機既地步？
網上就有各路人馬支持胡志偉，唔少人就讚胡志偉呢下回馬槍做得贏，八方今日唔想進入蔡子強 mode 講政治化妝領導藝術。八方感興趣既係誰才是「真民主派／真單車派」既討論，周澄就話「對龐一鳴有點失望。本來十分看好：清新、獨立、新思維、付諸實行、又肯透過參選來推動理念。但這種小器的挑機，實在令人覺得所謂「左膠」的mentality不就是如此嗎：自覺自己才是某種綱領的代言人、對有心同道人挑剔嘲諷、將運動簡化成人人都有能力做的到生活選擇（是不夠理解，還是不同情？）。」
係咪一定次次出街都踩單車先可以叫「真單車派」？呢個講法係咪忽略左好多人既現實條件（ [左膠 mode] 物質條件 [/左膠 mode] ）呢？自稱「左膠」既 Pat Tse 就話「即使在新界東，龐生也絕對不會是我的選擇。將反地產霸權濃縮為生活選擇的體現，叫被剝削的自由工作者自己走去搵勞工處幫手，不知是太天真還是太傻。好啦叫人踩單車返工，也未嘗不可，但走去挑胡志偉機之餘，龐生夠膽同日做十二粒鐘、勞動強度比他大十萬倍的基層工友講嗎？像他像我每日負擔到花三小時在交通上算我們幸運，抓住別人的白鴿原罪，無視無數人根本無得揀的事實（不論是財力上還是時間上），不如fxxk off啦。」Eric Tsui 則用一個無咁左膠同加個生動d既比喻去講同一番話，佢話「願意（及能夠）花時間全程踩單車當然值得欣賞，但係現實有好多客觀條件限制，冇可能要所有人做到最高標準先算環保，正如我唔會批評任何人點解要搭排放廢氣既渡輪，而唔划獨木舟過海。」
呢單嘢除左互相挑機之外，係咪可以有多d積極d既討論？Leslie Chan 就提到爭取單車上公共交通既政策，係真係會方便到好多人通勤，佢話「龐一鳴今次真係自膠，使用單車就不可用其他交通工具接駁，咩道理？多年來單車友爭取單車上巴士。難道對龐生來說都是錯？」經常拆單車上西鐵既小田就話，「龐一鳴先生叫人尖咀搭船過灣仔，其實單車上船費已於6月另加$13，好多基層街坊大受影響~單車返工除了拿來販賣自己外，不如一起推動及落實單車友善政策，單車並不只是消閒娛樂，也是交通工具，政府（運輸署）卻一直以來不承認……出來踩一轉又無主題，我睇唔到有咩用。」胡志偉自己都係《明報》訪問中提到，要推動單車友善政策，又提倡喺馬路留闊兩呎畀單車行，將坑渠蓋由斜坑紋變成方格。
八方花生就食完，黎緊就放長雙眼，睇下民主黨同胡志偉能唔能夠係黎緊四年做好份工喇！
本文由自动聚合程序取自网络，内容和观点不代表数字时代立场
