（圖片來自 Facebook: Ngan Piu)
斯諾登離開咗香港，喺香港嘅新聞重點變左特區政府嘅做法會唔會影響中美關係，以及究竟邊個係斯諾登喺香港嘅支持者。中美關係八方唔識講，但斯諾登支持者方面，因為近水樓台，都八到啲野。
又關陳玉峰事？
追呢條新聞嘅媒體分兩類，第一類係親中左派報紙，佢地對何俊仁話係來自北京嘅中間人勸走斯諾登好不滿，因為咁樣影響咗強國形象，搞到連厄瓜多爾都比唔上，所以話係何俊仁同陳玉峰影響斯諾登離港嘅決定。
大公報鬧何俊仁其實都叫做有幾分根據，起碼老何自爆有同斯諾登食 pizza 慶祝生日啦，但拉埋陳玉峰落水就真係估佢唔到！大公報仲強調 Melody 係佔領中環嘅核心人物！
八方抅晒頭，點解 Melody 會被點名呢？佢係訪問過何俊仁關於佔中一次，但全港數數埋埋好幾十個記者都訪問過老何啦，唔通佢帶晒啲人去見斯諾登？
大公靠估式文章，可能係因為Melody 係獨媒嘅活躍作者，而今次斯諾登事件，獨媒又反應奇快，出完報導又出聲明，最後仲搞埋遊行添。
靠估變事實，大公果然強！
靠估變事實，大公真係令人嘆為觀止，唔怪之得 Melody 懶得同佢澄清，索性喺 Facebook 到話：「没錯啦，我是有見到斯諾登，而且千叮萬囑叫他去冰島一定要帶埋我去，當時我手機沒放入雪櫃，一定是這樣便給作者知道了。」
而獨媒嘅阿藹亦加入恥笑行列：「呢兩日俾記者追瘦，問獨媒做咩要聲援斯諾登，係咪有咩中間人，原來係陳玉峰！早知我唔使顧左右而言他，叫佢地睇大公報。」
其實只要睇番 Melody 過去一兩個星期嘅 Facebook Timeline，就知道佢無可能有份處理斯諾登單野，佢除咗忙自己 law firm 嘅文件外，精力仍舊擺喺佔中度，6月16號參加完「基層婦女爭普選」嘅記招後，就喺度諗點樣幫基層婦女組織一個幫到佢地發聲嘅寫作工作坊，幾日後就泡製出一個「囡囡囡寫作一團」嘅計劃書。除非陳玉峰識分身同分心，點可能幫到斯諾登先生？
不過，自從 Melody 被警察低調通緝後：「我們都是陳玉峰」變成口號，中間人真係有可能係陳玉峰嘅分身。
邊個係斯諾登嘅支持者？
講完靠估同靠老屈嘅媒體，都有唔少正路做新聞嘅記者追查究竟邊個喺香港幫助斯諾登。八方整理咗啲資料：
法律支援：根據 SCMP 講，最早支援嘅律師係難民律師 Robert Tibbo，而佢係難民組織 Vision First 嘅顧問，另一位係何謝韋律師樓嘅文浩正，大概因為同一律師樓嘅關係，何俊仁較早知道斯諾登喺香港，但佢並唔係斯諾登代表律師，所以無受到律師與委託人之間嘅保密協議約制，成為媒體追殺式訪問嘅目標。
媒體支援：其實最早喺香港接觸斯諾登嘅係《衞報》記者，佢地五月底、六月初就已經到香港，負責拍攝斯諾登嘅記者 Laura Poitras仲喺獨媒準備緊遊行時，突然出現喺辦公室，原來佢拍緊斯諾登嘅紀錄片，其間千叮萬囑叫獨媒義工唔好同人講佢仲喺香港，因為實俾行家追殺，但佢依家大概已經離開咗香港， 爆出來亦無傷大雅。喺斯諾登段片公開前，Laura 一直將自己困係酒店，雖然好想出去趁下六四燭光集會，但係無辦法，只可以睇電視。
親北京陣營示愛：因為呢件事挑戰美國霸權，當斯諾登同《南華早報》講 NSA 黑入香港（中大）同北京（清大）嘅網絡後，親北京政團加入聲援斯諾登，李慧琼率先喺6月15日早上，民間聲援行動前去美領示威，但因為行動太急，搞到佢自己嘅群眾都唔知，結果有三、四個「愛」字頭嘅組織者，竟然去咗下午嘅民間示威，到場後見到講者全都係泛民，好不滿，自己圍埋一角鬧，但堅持行足全程。佢地好想斯諾登留港，可以大展反美愛國愛黨神威，所以對斯諾登走咗好失望，而當何俊仁爆出話係北京中間人勸走佢地嘅斯諾登，就認定係何俊仁別有用心，毁佢地大業。
駐港老外
老外支援：香港作為國際城市，有一大堆老外在港活動，有啲係金融精英，有啲係媒體人，有啲係外語教師，有啲係國際組織嘅職員。佢地好關心國際政治，當中好多人都睇唔順眼英美霸權，6月15日同獨媒一齊發起遊行嘅 blogger，Tom Grundy 就係呢類人。佢喺2005年反世貿時，就著住一件好似肯德基家鄉雞嘅毛毛雞衫喺 TVB 後面示威，抗議媒體扭曲反世貿示威。佢 HongWrong.com 嘅網站，聚咗一堆停留係香港、較進步嘅老外。
民間支援：民間郁得最快嘅係長毛同獨媒，除左長毛，香港仍然有唔少無政府主義、托派同反對美國霸權嘅左翼力量，部份喺6月13日率先跟長毛去咗美領館示威，部份如「街工」、「全球化監察」、「社會主義行動」、「自治八樓」等就以團體名義加入咗6月15日由獨媒統籌嘅民間聲援期諾登遊行。
至於獨媒，今次可謂反應奇快，於《衞報》爆出斯諾登喺香港當日，就出咗篇〈別交出捍衞我們私隱的爆料人 Edward Snowden〉，立場鮮明；同日仲追多篇冰島駐港領事的回應，第二日出埋「獨立媒體（香港）」嘅聲明同一啲譯文、跟進報導，到第三日，就開始推遊行。
獨媒角色
唔少記者追問，點解獨媒咁快決定落水？其實香港只有好少組織關注網絡自由，莫乃光嘅互聯網協會算做最老牌，但佢地唔係動員型嘅組織，而獨媒則為機動性較大嘅新派組織，因為有一位專門跟進媒體政策嘅組織幹事，對呢類事件內部一講就明，連八方呢類科技盲都好快理解到錂鏡行動離譜之處。
另一個反應快係因為其中一位獨媒嘅核心成員阿藹是網站「全球之聲」(globalvoicesonline) 嘅編輯。聽講佢6月10日一朝早起身開電腦，海外嘅朋友就不斷咁問佢點睇斯諾登來港一事，所以佢比本地媒體反應快好多。當然，獨媒出聲明前一定要確定斯諾登當時仲喺香港，因為有傳言話《衞報》出完條片後，斯諾登離開酒店，飛咗去厄瓜多爾。獨媒好快搵到一個可信嘅消息來源，確定斯諾登真係仲喺香港，仲知道有兩個人權律師幫緊佢。
確認咗斯諾登喺香港，香港獨立媒體網中曾經有編輯問可唔可以搵佢做訪問，但因為大家嘅手機同電郵都唔太安全，尤其係獨媒嘅角色將會變成遊行組織者，驚知得越多，越會壞事，所以無再問個消息人士係咪可以同斯諾登見面。而大家以「獨立媒體（香港）」名義進行聲援工作。
講得係消息人士，當然唔可以透露係邊個，但其實香港作為全球村嘅其中一個中心點，一定有人可以接觸到斯諾登。如果有跟開獨媒多年來嘅文章，就會知道核心成員阿藹亦曾經同 Wikileak 嘅阿桑奇見過面並有聯絡，要確認斯諾登係咪喺香港應該唔太難。
本文由自动聚合程序取自网络，内容和观点不代表数字时代立场
