今年五月有一晚，終於約到何偉航訪問。正想著，約了咁耐終於成事，即時新聞傳來，指「碼頭工人接受加薪方案」，筆者便知道那日，又見不到何偉航。
碼頭工潮時，好幾次在茶餐廳食飯，電視旁總有人「哎呀」一聲，「乜個男仔整親腳咩？」人們以為何偉航是在碼頭走動時受傷。
他是你在鏡頭上，見到支著拐杖在碼頭與工人同進退的男孩。其實他中學時一直如是。骨癌，做手術拿了右小腿一截骨出來，自此腳長腳短，出入用拐杖。
「工友口面，同我地唔同」
他是筆者大學師兄，未夠三十歲，職工盟幹事。好歹是個大學生，讀歷史。走到工人當中，卻原來是他怕被看不起，「驚D工友覺得，我只係一個o靚仔，乜都唔識」。碼頭的生活，扎實真確，更顯外人蒼白、心虛。「你見過工友？D口面同我地唔同的。輪廓好深、膚色好黑：對眼睛好白」，因為曬得多，海上反光，不少工友患白內障。
碼頭工潮是何偉航心之所繫，講不到兩句自身，他便又扯到工人身上。「當時有機手和我說，罷工無糧出，但就算係借邦民、安信兄弟錢，都要出來罷工」。他便知道，工人忍到底了，今次不是錢解決到的問題。
被認為衝動、「老粗」的工人，忍耐起來卻令人驚訝。何偉航難忘，一班之前沒行動起來的工人，好不容易「爆了」，在碼頭入面堵起路來，結果，法庭頒下禁制令，叫他們扯。何偉航自己也是被告人之一，不免激動，誰知工人好冷靜，「一個二個搬晒D野出去，學生仲係度嘈緊，話做乜野唔衝番入碼頭」。他意外，難道工人不想快點達成願望，佔據碼頭？但原來，「工人唔想令市民覺得，自己打爛仔交」，工人要揀一種自己的形象，他們要用「和平手段，要同佢鬥長命」。
Ambition
何偉航不是認輸性格，便是身體不便，也曾在中學曾組了隊 band ，叫做 Ambition，做主音和 keyboard。 「Rock 就是革命」，好型。語氣一轉，「不過個時，學校唔興呢D」，大家通常乖乖地、合規格，去唱合唱團。他卻組band，「綵排有女同學來睇」。
結他聲後來配上政治歌詞。他和一班中大團契朋友寫下《誰的憲章》，給劉曉波；後來又另有一首歌給趙連海。他是基督徒，但問到有無返團契，不免嘆氣，「我返唔到教會的了」。
因為信上帝，「是要 keep 住用身體做榜樣」，「但不少基督徒，連為六四死難者祈禱都唔肯祈」。
你行出彌敦道問，邊個唔識耶穌
現在在職工盟工作，何偉航辦公室在油麻地，地面人聲混雜，牛鬼蛇神，好一個人間。「其實成條彌敦道，你行出去問，邊個唔識耶穌，邊個無聽過五餅二魚？」
「咁香港人要怎樣的福音？耶穌和彌敦道上的人，有什麼關係？」大學時活躍於中大團契的他，自言現在「無乜返教會」。但筆者記得，汶川地震時，他與教友同學在大學站外擺下band及唱歌陣，為災民籌款。
「我成日問自已，如果耶穌係碼頭工潮當中，佢會點做？」工友當中，原來沒幾個教徒，多數一出來工作就沒再返教會，「他們說，星期日公司都要佢地返工做野」，慢慢疏懶，因為工作，因為在苛刻條件下要糊口，遠離了神。
以為他夾在一場驚心動魄的工潮中，總會有好多「懶深刻」的場面，談判起來又如何肉緊乜盛盛….. 由他說來，一切平淡。談判當日，判商大刺刺，竟以「夠鐘食藥」為由中途離場。但對何偉航來說，工會最重要有實力，誰人呈一時之快，贏了氣勢，亦輸了形象，他並不計較姿態。
「跟住是不是去海洋公園玩？」
做工會幹事，做到自己也被人告。去上庭，中午休庭限時限刻只能去金鐘食飯。被記者拍到，說他和李卓人去食意大利菜，不顧工人在長江中心外淒風苦雨捱飯盒。那間餐廳在太古廣場地庫，叫做 Grappa ，其實三個人才吃了 400 蚊。
他反而記起，真正的朱門酒肉臭。當時帶著一班工人的孩子去李嘉誠南區的豪宅外抗議，讓孩子們放開一個個寫上「取之有盜」的汽球。末了大家坐旅遊巴出去，經過海洋公園，有孩子問「跟住是不是去海洋公園玩？」工人爸爸鐵了心腸說，「仲要再出番去(中環)示威」。
何偉航唯有安慰，說完了工潮之後要和大家一起去。爸爸在爭一口氣，挽回生存的尊嚴；孩子不全明白，只知去「李嘉誠爺爺」門口放波，都幾好玩。
咁後來有無安排孩子去玩？何偉航一拍大腿，緊張起來，「太多野做! 不是講番起，都差點唔記得。一定要做番，應承左小朋友既野，唔可以呃佢地。」
後記
訪問當日是個六月的一個假期，何偉航仍回了辦公室，預備第二日城大一場工潮檢討講座，一點點把要派發的handout列印出來，逐份釘好，職工盟辦公室要做的事，仍多到令他倒瀉籮蟹。工潮似完未完。
本文由自动聚合程序取自网络，内容和观点不代表数字时代立场
