歐聯F組個四隊就好似四種唔同既人。
阿仙奴就係一個生不逢時既人，雖然年年都無冠，但年年都好好彩上到前四踢歐聯。歐聯年年都抽到好簽無乜硬野，唔洗打生打死就出線，但偏偏十六強就遇上硬野，最後黯然出局。今年抽到下下簽，滿以為遇上兩支硬野會九死一生，殊不知自己竟能突圍而出，手持十二分高高在上，呢個分可以話係其他組足以首名出線。滿以為順利入十六強，但又偏偏就因為格食格而要戰到最後一輪先知出線與否，仲要有可能由十六強變為歐霸三十二強。過到初一又過到唔十五，而家連十五都唔知有無得過。
多蒙特就係一個有實力但好不幸既人，上年打到入決賽，雖不敵拜仁，但假假地都係上屆歐聯亞軍。今季走左古沙，但加咗米希達恩、奧巴美耶呢啲有質素球員，理應出線無難道，卻不幸遇上傷兵潮，一個一個咁傷晒，仲要好無運咁輸波，連帶聯賽一同無好成績，差啲搞到要即刻跌落歐霸，好在及時回勇，但都要搞到最後一輪先知出唔出到線。就算出到線，分分鐘都要出住皇馬、巴塞呢啲勁旅。明明有實力，卻落得如斯田地。
拿玻里就係個雷聲大雨點小既人，今季大手入咗啲有質素球員，又改以盃賽大師執教，雖說不上為出線首選，但實力不容忽視，尤其第一輪就擊倒多蒙特，頭威頭勢，滿以為比到壓力阿仙奴同多蒙特，可惜接連輸比阿仙奴同多蒙特。就算最後贏左阿仙奴得十二分，但在「三個只能活兩個」情況下因得失球而轉戰歐霸。
馬賽就好似一個掙扎求存既人，由抽到要對阿仙奴、多蒙特同拿玻里呢條下下簽個刻就真係已經幾乎預咗包尾，人地一隊十六強常客、一隊上屆亞軍、一隊專打盃賽，反觀自己？雖然唔勁，但踢得歐聯就無弱旅，奈何命運卻編落死亡之組裡，莫講話轉戰歐霸，要拎分談何容易？雖然係咁，但佢地都好似唔信命運，堅信人定勝天，一於掙扎求存，拒絕未打先輸。雖然有時比到壓力對手，但奈何自己同其餘三支球隊實力仲有一段距離，就算幾努力掙扎都係無功而還，最後無奈接自己極有可能分組賽零分出局。
馬賽有實力，奈何對手比他更強；阿仙奴、多蒙特同拿玻里呢三支都係值得入十六強既球隊，但奈何遊戲規則只能「三支活兩支」，拎住十二分都可能要踢歐霸，死亡之組真係死亡之組。就算最終係邊隊出線都好，編得落呢一組，個四支球隊都係輸家。
如果命運能選擇，要好波還是好運？我想俗語已有答案了。
本文由自动聚合程序取自网络，内容和观点不代表数字时代立场
