唔知點解我對擺檔呢家野真係特別大感覺。
晚上插幡時，遇到一班年輕人。咁佢地話申請左某地方，我話，聽講有另外一檔會係度起壇。但斷估佢地唔會讓／讓唔到俾你喎， 因人地一早吹左雞係嗰度集合。咁擺檔既野每個位都會有同人撞，都係要互相協調。
咁佢唔知點好，話，「咁咪即係鬥早?」
我話，「現實上，唉多多少少係啦。但我作為社運仔，唔覺得應該係咁樣。」
我希望佢會諗到一d野。佢諗左一兩秒，話，「唔，係應該睇下邊個效用大d。」
我話，「唔係效用，而係團體之間有咩需要。各取所需囉可以話。如果人地團體有需要咪互相讓下囉。」
只可惜大家都要插幡，對話的 flow 就此中斷。
其實我想再講，講效用，如果講既係「在主流社會有 say」，咁我諗起既會係呢個團體更有條件去讓下人，而唔是要霸多幾檔／霸大d個位的。因為大家都應該知道，籌款／宣傳既機會，越大既平台係越多，d細檔，唔似人地黃洋達咁撚多野撈，就真係可能係很依賴過時過節擺檔的。
而效用呢樣野，我想，如果認為自己是社運／公民社會／抗爭 whatever 而也視對方為同路人 or 最起碼是比較相近的為了社會更好而工作的人，我諗，首先考慮的應該是互相關顧，而不是去給人家的工作打分數。更加應該要明白，好多無／細 「效用」既野， 往往就係社會中比較邊緣比較小眾比較弱勢的事，如果係咁，呢d就正正係我地應該要支持／堅持的事。如果社運圈內都因為認為對方做唔大做唔強，就踩住佢、踢開佢，談何平等公義呢？憑乜說社會應該要照顧基層、小眾、弱勢、被邊緣化者呢？
咁當然根本就不視對方為「同路人」，就唔係咁講。但這是另一個討論了。
另一位大叔的言論，就激得我頗嬲。他說，「呢個位我申請左小販牌既！」大佬，政府給你牌你就不用同人協調？咁仲屌咩政府？咁仲抗咩爭？咁仲公咩民抗咩命？不如以後睇政府頭算了。反正民間的事也是看誰有牌就誰大。
當然，我每年都有參與籌款，或為自己團體或為工作機構或為社運 project，而且過往亦曾因撼檔和其他人起爭執，就住擺檔問題而講三講四，好似係有利益衝突的。但我自問從無故意搶錢。姑列數例：曾於旁邊有年輕人的檔唔夠聲，我會叫人去睇佢地的檔支持佢地；曾為旁邊的團體張羅物資、朝早霸位；遇上邊緣團體，不用協調，立即讓位等等。但當然依然有很多地方做得不好。
做得不好，唯有記著一些人家教我的事。以前我所屬的團體，擺檔甚是鋪張，總之， 要霸氣！ 那時有本身不需要擺檔的師兄師姐屌我們，「你地咁搞，人地無資源既唔撚使玩，無資源既更加無資源，貧者越貧富者越富呀?」每思之，我都心有耿耿。唯有多加留意前後左右有沒有團體更需要空間。
此外，亦有團體是，認為自己本年經費足用，就唔籌旗，淨派單張，「留返d錢俾其他人」的。
當然對有些人來說，講乜都無用。佢就係人多旗多音響多，佢d人就係要企去你個檔，佢d旗就係要插滿成條街。話知你地插幡，是插在自己檔口及自己檔對面的欄杆，不會亂過界，佢地唔會理你，總之有位就插，梅花間竹，大家的旗亂哂有乜所謂，佢自己檔口大撚把。
當中其實有個別人係有禮甚至幫下人地手的。可惜個別既例子，都係會被其他黃蟲。 呀，唔係，係蝗蟲至啱，掩蓋了。
再咁搞落去，「社運」街站互相唔協調，搞到好似黑社會霸地盤咁，倒不如全部都要向主辦單位申請，然後抽籤決定位置好了。
但現實當然係無咁理想。
（雖然根本就應該係能夠互相協調先至叫理想。 而唔係要搵人出黎做規管。）
本文由自动聚合程序取自网络，内容和观点不代表数字时代立场
