《你而家未「埋洲」，但係將來會「埋洲」》
尋日睇新聞見到《27歲成港女大限？》，段新聞其中一個重點係「某部份」香港女人未嫁都好擔心。段新聞邀請港大社會工作及社會行政學系副教授，以及註冊臨床心理學家安慰女人sss，前者話：「不應將女性的市場價值定位在結婚和生育，貶低自己的價值。」；後者再話：「建議女性要先確定自己的心，尋找真正合適自己的對象。」
學者講得好複習，「27 歲是找男人的大限」呢件事，其實同我地細個玩「埋洲」個theory 係一樣的。由於呢個係電子世界的年代，我解釋下「埋洲」點玩，以防有D 「冇童年」的朋友唔知道。⋯⋯
「埋洲」的玩法：
–>首先要有一班朋友仔，有一舊野做目標(例如，橙柱)，然後有一個「不幸的人」捉人，其他人一方面唔可以比「不幸的人」捉到，另一方面要盡快掂到條橙柱，一掂到條橙柱你就安全，你就要大聲嗌「埋洲」。你一「埋洲」，你就可以拯救其他喪跑的人，扯佢過來。
–>個遊戲點為止玩完呢？個遊戲最奇妙的地方係唔會完架，因為，只要「不幸的人」找到替死鬼，掂到其中一個喪跑的人，「不幸的人」就可以喪跑去「埋洲」。
「找男人」VS「埋洲」
–>女人找男人，個玩法同「埋洲」一樣，所有女人都不停喪跑「埋洲」，女人係玩緊呢個遊戲的過程中，最驚的除左係「埋唔到洲」之外，其實見到喪跑的人一個個「埋到洲」，愈來愈少人喪跑都感到好驚慌。
–>今時今日，女人「埋到洲」，就會去Facebook改status大嗌「埋洲」。
–>與此同時，全世界都覺得你喪跑得愈耐，你就愈有機會成為終極「不幸的人」。
咁(暫時)未「埋洲」有冇嚇到瀨屎呢？
–>個世界真係有好多好似《東張西望》李漫芬的親戚朋友，一見到你，就問你「埋洲」未，但我「心口有個勇字」，我信張家輝個句：「你而家無，但係將來會有。」一日未死，我都有「埋到洲」的機會，不停「喪跑」的確有D 攰，但係我「喪跑」的期間，好多人都鼓勵我，我呀媽成日都同我講：「可能真係有人食錯藥肯要你架！唔好灰心呀！」
–>而最重要係，「埋洲」呢個遊戲其實唔需要做最快的，你最快掂到條橙柱係冇特別獎架，反而你痴住條橙柱，仲可能會羨慕玩緊「埋洲」的朋友仔。
我從小就冇大志，好似考試，我從來都唔會在乎邊個考第一，我合格就得，合格之餘有人唔合格我就已經自我感覺良好架啦。所以係「埋洲」呢件事上，其實唔使理一早玩完「埋左洲」的人，總之我相信，有一日，無啦啦，突然之間，我就會掂到條橙柱，我就「埋到洲」。
以上好似都係門面說話，個世界係真係有人喪跑都死都「埋唔到洲」，咁點算？
冇點算架，因為呢件事從來就冇得計算；縱然明白呢個世界充滿不幸，但總希望自己一世都有運，所以趁有氣有力的時候，咪「喪跑」住先囉。
原文載於姐死姐還在Facebook 專頁：
https://www.facebook.com/pages/%E5%A7%90%E6%AD%BB%E5%A7%90%E9%82%84%E5%9…
本文由自动聚合程序取自网络，内容和观点不代表数字时代立场
