今週本來諗住暫停『每週盲撐港足大行動』，因為要拜祭先人，不過家人臨時改咗拜朝早，所以又可以去『盲撐』喇！我喺鑚石山拜，拜完最近嘅『盲撐』地點，當然係對面馬路嘅蒲崗村道公園，今日蒲崗村有『四料娛樂』，不過我就只係揀咗丙組聯賽油尖旺 vs 電訊黎睇。
賽前油尖旺以56分排喺丙組第1，暫時拋離第2、3位嘅駿其天旭及淦源7分及10分，計埋今日，丙組仲有5輪比賽，所以油尖旺想升班嘅就一定唔可以錯過餘下嘅比賽(根據油尖旺足球隊Facebook Fans Page所講，油尖旺已為升班作準備)。而電訊就以15分排喺13位(尾2)，由於今年丙組升2降3，所以電訊現時積極護級，除咗虎門肯定會降班之外，荃灣、消防、安華、九龍城、龍城康體、電訊呢幾支球隊都有機會降班，照情況睇，以安華、九龍城、龍城康體、電訊嘅處境最為危險，極有可能其餘兩個降班名額會屬於呢4隊其中之2隊，尾2嘅電訊要護級，最好就要贏晒餘下5輪比賽，所以我未入場前已預測，呢場丙組聯賽戰況可能會好激烈。。。。。。
講返正題，油尖旺今日身穿紅衣黑褲，正選球員有陳海彰、戴偉崙等人，射手潘嘉煒不在陣。而電訊，如果我冇睇錯，今場就由黎明鐘做隊長，一開波整體實力較好嘅油尖旺就掌握咗控球權，但電訊以守為主，上半場油尖旺難以衝破銅牆鐵壁，射門機會都唔多，只有一球頭鎚頂中楣。
下半場，油尖旺換入梁烙峰增強攻力，但由於壓得太前，搞到後面好多『空間』，電訊有幾次快速反擊都幾似樣，但係射果腳就差啲喇。
雖然下半場油尖旺射門次數增加一倍，但命中率唔高，有一球中柱及空門頂高，但幾番努力下終於喺尾段打開紀錄，當油尖旺球員喺禁區娥眉月外戴球時，球証指電訊隊長黎明鐘撞跌一名油尖旺球員(睇唔清楚邊個)，油尖旺獲得一個罰球機會，此時全場跑上跑落嘅黎明鐘當然立刻投訴：「喂！佢自己碌落地吖！」。但在投訴已經冇用了，認為在無辜都只好接受。呢個罰球由陳海彰處理，結果怒射死角入網，入咗呢球之後我聽到有個球員高興大叫：
「Yeah！咩你老母！」
真係開心到咩老母，而另一邊，電訊球員當然都咩咩聲，只不過咩球証咁解，油尖旺就係咁險勝1比0。
呢場比賽雖然冇咩人關注，而且兩隊嘅球員都唔係職業，但由於各有因由，所以比賽過程都幾激烈，電訊球員更多次倒地受傷，好彩冇變成武鬥場，丙組聯賽又點？一樣可以好睇。但我就認為，油尖旺可以打得更好，佢地今場初段時間好多長傳都失效，後面都係幾多蝦碌，好彩守門員身手有返咁上吓同埋電訊把握力真係一般。
本文由自动聚合程序取自网络，内容和观点不代表数字时代立场
