今年暫時為印尼Arema(阿雷馬)喺亞協盃射入3球嘅Cristian Gonzáles(干沙利斯)，係印尼當地著名嘅球員，司職前鋒嘅佢喺喺印尼聯賽征戰咗10幾年，總共已經射入咗百幾球，呢位37歲嘅大叔絕對係近代印尼足球界嘅重要人物，對亞洲足球有興趣嘅你，一定要認識吓呢位大叔。
干沙利斯喺烏拉圭蒙特維多出生，1994-1996年代表過烏拉圭U20國家隊，同期戰友有Álvaro Recoba(列高巴)，不過當時出任攻擊中場嘅干沙利斯就冇列高巴咁好彩，最初只能喺烏拉圭甲組球隊Sud América(美洲南基)做大後備，2000年轉會加盟Deportivo Maldonado(拉科魯尼亞馬爾多納多)先有多啲上陣機會，唔少同期戰友已經成為大國腳，甚至成為世界知名球員，但干沙利斯依然係一個喺烏拉圭藉藉無名嘅球員，依然要喺烏拉圭甲、乙組之間浮沉，有段時間，干沙利斯失去動力並沉迷女色，2002年干沙利斯喺烏拉圭認識咗一名能操西班牙語嘅印尼女子，佢對呢位叫Eva嘅大波印尼妹一見鍾情並展開追求，2003年更與Eva一同來到印尼生活，順道揾班落，結果成功加盟一支蘇拉威西球隊PSM Makassar(望加錫)，改打前鋒，首個賽季射入27球，協助望加錫奪得亞軍。
但到咗2004年，干沙利斯因為火爆嘅性格累事，佢喺一場比賽完結後打警察而被重罰，受到呢啲不利因素影響呢個賽季干沙利斯嘅表現亦不如理想。2005年，解決咗『打警風暴』嘅干沙利斯加盟另一支東爪哇球隊Persik Kediri(佩斯克)，並射入咗25球，協助佩斯克奪冠，經歷咗佢一生第一個聯賽冠軍。2006年，在為佩斯克射入29球。2007年在射入32球，並喺亞冠盃對浦和紅鑽嘅比賽中射入2球。
干沙利斯加盟萬隆嘅歡迎會，有2萬人出席。
干沙利斯喺當時已經成為印尼聯賽當紅人物，但操守非常有問題，喺2006年對PSIS Semarang嘅聯賽中，干沙利斯襲擊對方球員Emanuel de Porras，2007年對Pelita Jaya(佩利達)嘅聯賽中向裁判吐口水，2007年及2008年又衰打人，但判刑卻非常奇怪地輕，究竟可因？自己諗。
2008年，佩斯克因為財政問題而將干沙利斯租借到西爪哇著名大球會Persib Bandung(萬隆)，最後正式簽約成萬隆球員，但因為年紀問題，佢嘅入球數目大大減少，不過3年間都為萬隆貢獻咗41個入球，比唔少外援犀利。 由於喺印尼有家庭，而且能夠操一口流利印尼語，加上有一定入球能力，所以早就有人游說干沙利斯入籍印尼，最終喺2010年正式入籍成功，成為史上第一位入籍印尼嘅外援球員，並喺印尼國家隊身上取得11個入球。
2011年，干沙利斯加盟另一支婆羅洲球隊Persisam Putra Samarinda(佩斯森)，射入咗18球，2013年以36歲之年轉投大球會Arema(阿雷馬)，與巴西前鋒Beto及前港甲外援基夫合組『老人鐵三角』，最後射入咗19球，成為阿雷馬首席射手。
呢位37歲嘅大叔因為一個『情』字誤打誤撞成為印尼足球界火紅人物，為咗融入印尼社會，佢改信伊斯蘭教，最後更放棄烏拉圭國籍，為印尼國家隊上陣，昔日火爆嘅烏拉圭怒漢近年脾氣好咗，雖然年紀大，體能下降，而且身型肥咗好多，但由於印尼聯賽水平唔太高，所以佢依然有貨賣。
干沙利斯唔係一位靈活型嘅前鋒，速度一般，而且冇咩腳法，但勝在把握力強勁，射術幾好，而且會利用肥大嘅身型去搶位及做二傳，雖然只有177cm高，但迎頂功夫依然有，但佢嘅絕技其實係遠射，腳力驚人。
干沙利斯嘅同期戰友列高巴早就成名國際，而干沙利斯卻要到2010年入籍印尼後先有些少國際知名度，不過能夠喺印尼成為當紅球員，曾經年薪高達90萬英鎊，係東南亞高薪球員，而且打過國際級賽事，亞冠亞協都打過，又拍咗好多廣告及客串好多電視劇做埋演員(但完全冇演技)，有咁嘅人生都唔錯了！
本文由自动聚合程序取自网络，内容和观点不代表数字时代立场
