今日係世界自閉症日，係一個呼籲大家關注自閉症患者的日子。今日睇睇下新聞，睇到一個我完全唔記得的名字：庾文翰…
庾文翰事件發生係14年前，由於真係好耐，簡單講下。庾文翰係一個有自閉症同輕度弱智的人，14年前（即2000年），佢當時15歲。2000年8月，佢呀媽係油麻地地鐵站同佢返屋企的途中，佢走失左，而佢竟然好似識瞬間轉移咁，去左羅湖關口。由於佢冇隨身攜帶身份證，而且佢又因為弱智同入境處職員溝通唔到，最後香港個邊當佢係內地兒童，送左佢過深圳，之後佢就一路失左蹤。
今日南華早報因為世界自閉症日，訪問庾文翰呀媽，原來佢仲搵緊佢個仔。
14 年前，庾文翰事件引起左全港關注，保安局仲連同公安，搵了庾文翰好耐。好奇怪係大家都唔係好鬧政府人員疏忽。對於庾文翰可以瞬間轉移去到羅湖，好多市民竟然鬧庾文翰呀媽唔拖實個仔，唔怪得人。仲有好多猜測，話庾文翰呀媽根本自己帶庾文翰去羅湖，唔要佢，唔係佢點識轉車。亦有人話，佢呀媽根本係想要賠償，因為當時庭外和解，都市傳聞賠左200萬比佢。
14年後，見到庾文翰呀媽仲搵緊個仔，覺得好心酸，如果佢係真係有心放底庾文翰，真係堅持唔到14年架。我唔知你地信唔信佢呀媽，但我真係信，可能香港人比人呃得多，我地先有咁多懷疑。
我今日睇到呢個新聞，我真的好想同庾文翰講聲對唔住，因為有一期，好興用「你真係好似庾文翰」來恥笑D 朋友仔智障，其實人地當失左路已經好陰公，我細個呀媽遲左接我放學我都哭崩長城。
諗深一層，社會真係太唔關注自閉症人士，所以先會誤解同笑佢地。又如果當初，入境處的職員，有多D 了解社會有不同障礙的人，就唔會咁倉卒咁送走左庾文翰。
尋日，Google 叫人找返150 隻寵物小精靈，你話如果14年前，有 Google map 找庾文翰呢個 function ，你話幾好呢。
如果你真係知道庾文翰下落，幫幫手呀，個D 好努力找比卡超個D 人，順便都留意下庾文翰呀。
PS. 題外話，尋日不停找精靈，真係令人諗起超級無敵獎門人個「一家大細靠哂你」的環節，一家四口，個爸爸要一星期，背哂所有寵物小精靈的精靈，先可得到獎品。我知道那邊廂，庾文翰屋企人都「一家大細等緊你」，祝福庾文翰媽媽，呢14年，太辛苦啦。
庾文翰新聞報導
原文載於「姐死姐還在」Facebook 專頁
本文由自动聚合程序取自网络，内容和观点不代表数字时代立场
