筆者近期在網上看到一條由甘草演員盧宛茵主演的短片，叫做《[公屋潮文] 公屋●居屋●私樓》，是改篇自著名高登潮文《女朋友帶你返屋企食飯》。看了這條短片，尤其筆者認識片中某位角色，突然有個念頭，不如我來個N次創作，寫個足球版本。
盧宛茵版的短片
香港雖然是足球沙漠，但仍有很多人從事跟足球相關事業的工作，如果這些朋友去見家長，伯母又會有咩反應呢？筆者其實唔太清楚以下幾份工作背後會唔會好筍，都係靠印象寫，如果有錯，歡迎大家提點，或者睇完就算都冇所謂，因為筆者都係無無聊聊咁吹出黎。
我係球員：「女朋友今晚帶我返屋企食飯，伯母問我做咩，我話做球員，踢緊南華，未來想步陳七後塵，返大陸搵食，賺人仔。雖然大陸多黑哨，可能又要踢假波，但冇辦法啦，我都想快啲搵夠錢結婚，宜家咪辛苦啲。此時，伯母話有啲唔舒服，要入房先，你自便啦。我就同女朋友大家眼望望，最終不歡而散。」
我係記者：「女朋友今晚帶我返屋企食飯，伯母問我做咩，我話做記者，專門採訪足球新聞，喺報紙度做，喺東方呀，不過人工就少啲，好後悔之前冇轉行做財經。呢餐飯，我有飯食，都叫做又有肉食吓，但成餐飯伯母都冇再問我，話之我浸大定中大新聞系畢業，食完飯，伯母會大聲叫：『女，送客！』」
我係講波佬：「女朋友今晚帶我返屋企食飯，伯母問我做咩，我話做講波佬，喺電視台，有線呀。不過就冇英超、西甲、世界盃講，但都叫做有得出吓鏡，算係咁啦。呢餐飯，我都好開心，有飯食之餘，又有雞胸食，伯母好欣賞我講德甲同日職，而且話題非常之廣，有講有笑。有得出鏡有得威，話之你咩大學畢業。伯母仲問我返工會唔會見到陳豪、馬國明……走時仲會點點頭。」
我係波衫店老闆：「女朋友今晚帶我返屋企食飯，伯母問我做咩，我話開舖賣波衫，間舖都有幾百呎咁大，早年老豆老母做落盤生意，我又鍾意足球，咪接手囉，算係咁，自己生意，好過打份工、幫人哋賺錢。遲啲間舖賺到錢，一定唔再租，買間舖黎做，伯母話我有志氣，又叻仔，因為我有盤生意。呢餐飯，我好開心，有飯食之餘又有魚食，有講有笑，走時伯母問下次去我舖頭買衫有冇折……」
我係馬會操盤手：「女朋友今晚帶我返屋企食飯，伯母問我做咩，我話喺馬會做操盤手，負責睇住啲傻仔明知我哋做莊賺梗都送錢俾我使，雖然有時返夜晚，但都叫一份專業，好難入行，年年有人工加。成餐飯，好開心，好溫馨，你會好似多左個老母咁，伯母又會好欣賞我當年讀數學同電腦嘅決定。呢餐飯，有飯食之餘，又有雞脾食。走時伯母會問我今晚場歐聯有冇內幕貼士……」
我係足總高層：「女朋友今晚帶我返屋企食飯，伯母問我做咩，我話喺足總做高層，雖然係高層，但唔係好忙，得閒都係開吓會。我老豆見我鍾意足球，前幾年就同個世叔伯講聲，我就入咗足總度做，平時同主席、董事講吓波，傾吓馬。呢餐飯，有飯食之餘又有雞脾食，伯母笑容由心裡笑出黎，因為個女可以搵到個有錢之餘屋企又有權有勢嘅男朋友。話之你有乜學位有乜沙紙，有個有錢老豆最緊要，走時伯母會問你點解唔坐多陣、同女入房睇埋場歐聯先走。」
參考資料：女朋友帶你返屋企食飯
本文由自动聚合程序取自网络，内容和观点不代表数字时代立场
