清明又過左一個星期了，我在清明前再次「收野」，收到2014的第3張請帖。無論我「這剎那在何方」，D親友都「刮」到我出來請我飲。D請帖就好似《哈利波特》封入學信咁，D信會飛入屋，躲也躲不過。
見到清明前收到的呢張帖咁華麗，就知又係一個以TBB台慶做藍本的華麗婚禮。《萬千星輝結婚典禮》都有著以下的原素，真係如有類同，實屬巧合：
首先係張請帖，最近新聞話，現代請帖會隨帖附送新人結婚相，感覺上有野送抵返D。請帖真係唔洗搞咁多野，唔使一打開有音樂，唔使一打開彈pair立體新人出來，更加唔使「滴」個律師文件的蠟印封口。我最緊張的其實係張帖冇漏到張餅卡同埋個10蚊回體利是，張餅卡就好似買日用裝M 巾附送個片夜用裝咁重要。請帖日期地址印錯唔緊要，pair人個名錯左我亦唔在乎，反正Facebook一個月前就會不停倒數remind 我。
然後就係擺酒「播放生平」環節，我真係無興趣睇你結婚相，因為真係同真人唔同哂樣。點解而家冇左玩新郎新娘環節，我最想睇你地尷尬到不行的樣，還返個玩新人機會比我地。
點解擺酒要有天才表演環節，細個個時懇親日（撼親日）仲表演唔夠呀？每次表演，我都好想大叫：「留返公司annual dinner 個時表演啦你」
再黎就是無窮無盡的換衫，點解每一個菜式新娘都要換一套衫，台面個菜單其實係咪你D衫D名，套紅運乳豬係for 進場，套美點雙暉係for送客的。而且套套衫都好似問《我和春天有個約會》個麗花皇宮借返來咁樣。
點解個結婚蛋糕幾層高，都唔見切完有得比我地食。如果有得食返，個蛋糕可唔可以好似中式茶樓個鴛鴦炒飯咁，一半係朱古力脆脆，一半係芒果繽紛？
報紙寫一個標準的《萬千星輝結婚典禮》要30萬，如果你有30萬又唔買樓，如其擺酒，不如捐比東華啦。Pair新人上電視移交大支票，一定難忘過擺酒。東華當日pair新人照舊可以去TBB服裝間揀返件飲衫，著到鬼火咁靚上台。汪呀姐會透過東華個節目，宣佈pair 新人決定將結婚個30萬捐出去；話埋比香港，華南地區，以至歐美，澳加所有親戚知你地結婚單野。親友想比人情咪打100條線捐埋比東華囉。當晚仲可以安排「卡啦之星」唱歌比pair新人贈慶。TBB同東華不如考慮下呢個套餐，有意義過擺酒，唔止親友會祝福你，受益人都會祝福你。
PS. 當我正在埋怨D請帖好似M come咁，月月都來的時候，我爸叫我好好珍惜朋友仔個個年輕，喜事重重的日子，個個月收到請帖並不可怕，老的時候，月月收到「白色的」才可怕。
原文載於姐死姐還在Facebook 專頁
本文由自动聚合程序取自网络，内容和观点不代表数字时代立场
