【俄羅斯足球員李維諾夫因為喺印尼追討拖欠嘅薪金要賣果汁為生】
巴西不敵德國1比7，好慘？有幾慘？點夠李維諾夫慘呀！
來自俄羅斯嘅足球員Sergei Litvinov(李維諾夫)喺印尼足球界打滾咗4年，佢非常熱愛印尼嘅梭羅市，但諷刺嘅係，最後佢非常熱愛嘅印尼將佢驅逐出境，因為佢過期居留一年。李維諾夫喺今年6月27日喺中爪哇梭羅市被逮捕，並由移民局扣留喺梭羅市。
李維諾夫司職中後衛，今年27歲，喺俄羅斯濱海邊疆區首府海參崴出身，梭羅市足球迷稱他為『BEJO』，意思係『幸運』。李維諾夫足球生涯首支效力嘅足球隊就係老家嘅海參崴足球隊，當年佢滿19歲，但喺海參崴足球隊2年時間內只係打預備隊。但係，海參崴足球隊經常拖欠薪水，而且李維諾夫喺海參崴足球隊內冇任何機會，所以佢去到乙組Okean Nakhodka(奧基尼)揾機會，但，奧基尼又有拖欠薪水嘅情況，於是乎李維諾夫離開俄羅斯，去到印尼加盟Solo FC(梭羅FC)，並成為梭羅球迷最喜歡嘅球員之一。2013年，李維諾夫加盟另一支印尼次級聯賽足球隊PSLS Lhokseumawe(司馬威)，但司馬威又拖欠佢半年薪水。司馬威唔肯發放拖欠嘅薪金比李維諾夫，李維諾夫向媒體、印尼足協求助過，但冇乜大幫助，為咗爭取自己嘅權利，李維諾夫一直逗留喺梭羅市，得到梭羅球迷嘅幫助，賣果汁為生，一邊追討拖欠嘅薪金。
李維諾夫：「印尼球迷比球隊更有人情。」(indonesia goal.com)
「這是因為他沒有足夠的錢返回俄羅斯。」(indonesia goal.com)
李維諾夫：「我希望在印尼打球的人，不會像我這樣。」(indonesia goal.com)
依家印尼足球聯賽鬧雙胞事件告一段落，拖欠薪水嘅新聞冇乜，但幾年前鬧雙胞留下之火種亦在。大家睇世界盃，見到啲足球員大部分好幸運，其實呢個世界仲有好多足球員基本生活成問題，李維諾夫只係冰山一角。依家李維諾夫仲末拎返啲薪水，佢遣返俄羅斯前向記者笑說：「我沒有任何東西可以拿走，我只好帶上鮮花回家送給老婆。」李維諾夫說他將繼續向國際足聯投訴爭取他本有之權利。(sport.detik.com)
印尼有啲球迷總係要說：「我地嘅足球聯賽就係吸引唔到國際級外援到來」。可能佢地見到隔離馬來西亞超聯(MSL)粒粒星有感而發？其實呢幾年都有啲有國際級嘅外援去印尼揾食，只不過逗留時間唔長，印尼聯賽只係佢地嘅踏腳石。依家印尼超聯的而且冇乜國際級數外援登陸，大部分都係名不經傳，名氣最大應該係效力Persija(佩斯查)嘅前克羅地亞國腳Ivan Bošnjak(波斯查克)，但我諗大部分人唔知邊個叫波斯查克。
國際級數外援唔係印尼人請唔起，係請得起但人地都唔肯黎。呢幾年來自印尼足球界嘅負面新聞多如牛毛，有外援冇糧出呢啲基本保障問題令部分外援冇考慮印尼去作為一個揾食好地方，其次係水平、當地環境亦係問題，而且呢幾年印尼球會出手不及馬來西亞『喪』，兩地水平唔係差太遠，馬來西亞保障大啲環境又好啲，當然好過去印尼。
本文由自动聚合程序取自网络，内容和观点不代表数字时代立场
