|
90後 小學生湧入維園
|
【本報訊】六四事件過去了22年，當年熱血青年已成「老鬼」，但不要緊，90後「小鬼」來了，昨日更遍佈整個維園，更「有氣有力」，是最早前來填滿一個足球場的生力軍。無論是雙十年華少女、facebook宅男或是小學雞，都是在資訊爆炸的互聯網時代成長，對六四事件的了解絕不含糊，將老鬼的民主棒牢牢地接住了。
記者：翁煜雄、羅偉光
 一群群90後中午已帶齊「糧餉」到維園空地，因而霸得有利位置參加集會。 區民傑攝 |
六四燭光集會以往總待傍晚才漸漸多人，但昨中午已有市民湧到台前霸位，當中不少是90後青年，帶齊薯條漢堡或壽司等「糧餉」，「想坐前啲投入啲嘛，坐十個鐘好小事啫！」不少也像中四的Florence、Meon及Joyce般，帶來90後孖寶「iPhone」與「單鏡反光相機」，「iPhone可以玩Angry Birds打發時間，相機影相後要放上facebook嘛。」
 雙十年華的少女，也是民主運動的生力軍。 |
 少女在街頭派傳單，宣傳網上直播六四集會。 謝榮耀攝 |
批評北京時頭頭是道
部份是自發結伴前來的「小學雞」，六年級的小男首次參與，「唔想淨係聽人講，想親自睇吓」，身邊的Sally更犀利，雖只是小五的「小鬼」，但已第三次參與，「第一次嚟係好奇，繼續嚟係因為，如果我哋後生嘅唔做，邊個做？」Sally談起政事態度絕不兒嬉，批評北京當年鎮壓學生更是頭頭是道：「政府點可以殺自己人民？我知道之後好唔開心。」
她們坦言校內甚少談及六四事件，故矢言會肩負傳播民主種子的責任：「我哋返到學校會同同學講，等多啲人知。」14歲讀中二的Donald是去年五區公投後，激起對社運的興趣，現時放學後都會跑到大哥哥大姐姐發起的研討會、示威活動，「尤其係六四事件，我哋有責任唔畀人遺忘」。
 90後的「小鬼」遍佈整個維園，各人燃起點點燭光，接力爭取民主。 劉耀輝攝 |
對時事比80後更熱情
「我要親身經歷過，將來先可以同個仔分享。」15歲的林鉅禧對於六四事件的認識，主要來自爸爸，「三年前睇電視見到燭光集會，問爸爸係咩嚟嘅」。林爸爸當年便在電視機旁向兒子講述這場可怕又可悲的歷史悲劇，「阿爸講到自己都好激動，眼都紅埋」，爸爸罕見的激動，勾起小男孩對這段歷史的興趣，「後來知得越多越傷心」。
「主要都係上網搵六四嘅資料。」鉅禧說，90後幾乎是在互聯網發展中成長，所以更易獲取資訊，「所以比起80後，我哋對時事嘅熱情可能仲強烈。」他舉起一部單鏡反光相機笑說：「你留意吓，我哋多數都會帶住部大機，因為要影多啲好相，放上facebook分享嘛。」說時遲那時快，鉅禧同伴已將他被訪情況攝進鏡頭：「一陣whatsapp畀你啦。」
 每年的六四燭光集會，是新一代學習民主的地方。 劉耀輝攝 |
「越係打壓 越想反抗」
反叛是年輕人的獨質。「佢哋越係打壓，我哋越想反抗！」18歲的李佩珊說，今時今日趙連海、艾未未等遭打壓人士的遭遇，都讓年輕人更討厭內地不民主的政權，並因而更想去了解89年那一場遭血洗的民主運動，「內地政府唔畀內地人講六四，我哋香港人有自由，有責任講多啲」。小學二年級才由廣州來港定居的秦家寶感受更深，「我都係嚟到先知有六四事件，家返到廣州，啲朋友仍然唔了解呢件事，好可惜」。
本文由自动聚合程序取自网络，内容和观点不代表数字时代立场
