（獨媒特約報導）菜園新村經歷眾多磨難，終於開始動工建設。村民目前仍暫居臨時屋，不過未來的全新家園，給予了他們足夠的希望。
游伯，由菜園村「不遷不拆」運動開始一步步走到今日，他經歷的事情很不平凡。本來訪問是希望談談游伯從落戶舊菜園村到建新村的心路，不過即便游伯不說出口，記者也感受到這幾年抗爭經過帶給游伯甚麼。訪問行將結束時，游伯帶記者看看他家裡的其中一道牆，牆上貼滿了游伯和很多八十後、學生和老師的合照。「哈哈你睇吓，呢班後生仔女好有心，又支持我哋！游伯好開心！」對於游伯來說，仍然可以每天耕作、間中有一班老師、學生和協助他們的朋友來探望，已是最開心不過的事。最令游伯鼓舞的，自然是新村落成屋，重新擁有一個屬於自己的家。
五十一年的家園被迫遷
游伯曾於舊菜園村渡過五十一載，游伯一家四代人也住在菜園村。「菜園村呢度每一家每一戶最少都有三代人住喺呢度，有啲甚至到五代都有呀！菜園村歷史都好悠久。我哋菜園村好好，村嗰度有個鐵絲網，一拉埋夜晚就咩都唔洗鎖。左右隔離都非常和睦，有咩事大家都互相幫助，好團結。」
對於菜園村，大家可能就只是知道菜園村居民被逼遷，但菜園村的由來又是怎樣？游伯由他的身世開始說起。「我哋以前喺大陸就做生意嘅，游伯我嗰時出到嚟（香港）得十幾歲咋陰公。嗰時文革，啲夥計同我媽媽講快啲帶個仔走，話我哋唔走，地主就（批）鬥我哋啦，嚇到我媽媽就喺我十四、五歲嗰時帶我走，留返個細佬喺上面，細佬就比人鬥得慘啦….細佬就喺上面俾人折磨，好彩阿嬸佢眼見咁樣唔得，就帶我細佬偷走落廣州…呢件事我後尾先知，佢哋俾人鬥到冇啖好食、衫都冇件好，好彩有啲鄉里幫手。」
初到埗的游伯生活也不好過，吃了不少苦頭。「嗰時農場、工廠都冇一間，唔理咩地方啦，大埔、沙田、上水、屯門、錦田都係種禾嘅，我哋最後落去錦田。個村長叫我幫佢看牛，佢話：『唉冇辦法啦，依家共產黨咁樣，幫我看住牛先啦，依家咩都冇得做啦。』咁好啦，我媽媽就幫人割禾，咁捱捱吓就儲到多少錢剩啦。我哋就想搵地方，因為始終都係租人哋。如果我買，咁就係自己地方。媽媽就周圍問人，話我哋想買田起屋，一路就問到梁屋村，就喺菜園村後面，就買咗。點解嗰時佢哋會肯賣？因為鄉下啲細路大個咗之後就去咗第二度發展，後生走哂就得返啲老嘅同細路仔，冇辦法耕田，所以我哋就買到。以前啲左右隔離見我哋買咗，叫我哋介紹，後尾個個都買，就變咗條菜園村出嚟啦！」
初來埗到 務農維生
菜園村村民大多都有務農，游伯亦不例外。「以前我都係種菜多，我地有個合作社，即係石崗菜站合作社，我哋幾十戶都係社員嚟。因為我哋村歷史耐，石崗菜站都開咗成五十年，喺長沙灣個蔬菜批發市場定咗一個位，專門做批發。我哋嗰時出菜好犀利，朝晚成百幾…唔止呀，二、三百籮都有呀。朝早八點半出一次菜去長沙灣，下晝四點半又一次，我哋去到就俾啲買手批發。」
說到游伯的耕作技巧，原來是由一代傳一代而來。「嗰陣細路就朝晚幫吓手，有時要返學嘅，咪朝頭早幫手淋咗水、種咗菜先返學囉，返工都係一樣啦。以前種菜都辛苦，用人工擔水擔肥去種，後尾搵到啲錢就較個水喉，個水喉就噴水嚟淋，咁就冇咁辛苦喇！」
當記者問起游伯的子女和家人時，游伯會心一笑地說：「我成六個仔女呀，我哋呢度呀每一家人最少四個，有啲八個九個呀，所以我哋菜園村真係好多人。我哋嘅小朋友都好聽話，一讀完書就自動搵嘢做，唔需要父母教。游伯我好彩呢就有個媽媽，啲仔女好聽佢哋阿嫲話，嫲嫲一食飯就講吓做人嘅道理、第日出嚟社會要點呀咁…最主要一樣嘢就係出去社會要賺個錢。之後啲仔女畢咗業出去做嘢，佢哋有聽話，依家就可以自己供樓啦，有啲供完咗添！呢樣就係嫲嫲教得好。」
一直在菜園村生活得相安無事，一條高鐵就輾碎了村民的安樂窩，更甚的是政府不負責任的態度，令村民為之氣結無奈，亦促成了市民反高鐵的導火線。「要我哋搬村其實我哋都同佢哋講道理。鄭汝華成件事都有三個唔啱：第一，條高鐵本身唔過菜園村，點知人哋一反對就行菜園村；第二，你政府收人地係咪要預早幾年通知呀，但係你要菜園村兩年都未夠就要我哋走清喎，兩年都冇咁點走呀？最少都五年通知啦，呢個搞到我哋成條村一把火；第三，最冇道理添，有幾個建築師好叻㗎嘛，同鄭汝華講唔由菜園村過可以慳返三百億，建築師講嗰條路又快又慳返錢。慳返納稅人幾百億喎，但佢（鄭汝樺）死都唔肯，係咪當納稅人嘅唔係錢呀？第日報紙賣出嚟，原來鄭汝華係咁嘅！就係呢一次之後，全港市民一齊反高鐵！」
不遷不拆到建新村
在爭取「村換村」期間，一眾熱心的市民聲援，令村民暖在心頭。言談之間，游伯不時表示十分感激一班曾經關心、支持菜園村的市民和師生。「大家反高鐵就圍住立法局，就支持菜園村。初初市民以為我哋菜園村冇道理，後尾知係鄭汝華冇道理。其實市民咁幫我哋我哋都好感動，特別係班八十後、同學同老師。全靠佢哋支持我哋，如果唔係我哋都爭取唔到舊村換新村。嗰時一嚟拆村，幾多學生嚟呀！好多間大學學生，連台灣、仲有啲留學生都嚟到菜園村，鄭汝華見到咁先答應村換村咋。佢都係怕咗老師學生，菜園村都係咁樣換嚟！我哋嗰陣有幾個村民呀、朱凱迪都俾拆村啲人整親。收村嗰陣我都有擔心同學，驚有碰撞整親，我哋都盡量克制自己。例如個保安喺度，我哋就企喺佢面前，唔會掂佢，佢亦都唔敢掂我。佢想拆邊間，我哋就咁樣阻止佢，一路堅持同佢哋講道理，直至鄭汝樺應承村換村我哋先俾佢拆。成個過程我哋都冇還手，一直都忍，堅持講道理就感動到啲市民，呢個係我哋爭取到新村其中一個理由。」
爭取到村換村後，村民便著手為新村選址。「答應咗換村我哋幾開心呀，跟住我哋咪搵地方。朱凱迪佢哋呀，幫我哋搵地方同埋地方，都搵咗幾個月。呢度唔啱，嗰度又貴，最後搵到呢度。搬咗村之後我就話：『死啦，我哋舊村嗰陣咁多老師同學嚟探我哋，我哋嚟到新村唔知仲會唔會有呢？』點知唔夠兩日，就有學生嚟探我哋，我哋不知幾開心呀！佢哋對我哋都好好，久唔久就打嚟關心吓我哋。」
暫居臨時屋 仍堅持耕種
村民搬村磨蹭了差不多兩年，重建菜園村時，村民需要一個復耕牌才能建屋。「復耕牌本來就俾人耕種，而臨時屋牌十幾廿年前已經取消咗。而家佢就做到復耕牌就等於臨時屋牌，我哋就要交返啲關於我哋種嘢嘅資料俾政府，例如個菜站、種幾多塊田、種咗幾耐。之後就批准咗啦，復耕牌都搞咗成半年。跟住又要搞個士多房，用嚟擺嗰啲鋤頭、耙仔，冇士多房我哋啲嘢擺邊、點樣耕呀？搞個百幾呎士多房又搞咗幾個月。仲要搞個地政、批准我哋點樣起屋又幾個月，咁就搞咗兩年。」
現時暫居於臨時屋的村民仍會耕種，把收成批發出售。「我哋耕田都耕咗年幾兩年，日日都幾乎有菜出，都唔錯呀，仲有啲錢賺呀！不過係呢排就落雨落到少菜咋。我哋睇季節去種嘢，依家一到春夏天就一定要種啲唔怕水嘅，好似莧菜、蕹（通）菜嗰啲。到秋天又唔同啦喎，有生菜、唐蒿、芥蘭、菠菜，好多㗎。莧菜十八至二十日就有收成，最快就係佢啦，蕹菜就耐啲，都要個幾月先有得割。啲菜唔會話賣唔哂，同埋我哋有有機菜牌，菜價又賣得好啲，都算唔錯啦。」
對於重視家園、熱愛土地的游伯，新村落成對他而言一定意義重大，他與菜園村的故事將會繼續下去。
編輯：黃俊邦
本文由自动聚合程序取自网络，内容和观点不代表数字时代立场
