話說小妹幫趁左3流動電話上台三年，至今年5月頂唔順佢亂收費，轉去其他電話公司。佢6月中叫小妹交返5月的餘額$13.06，正常人都會交$13.00就算啦。點知我七月中竟然同時收到3香港的電郵和平郵來叫小妹交返果$0.06，係$0.06！！！叫人點交呀？！
然後，我經歷了以下的步驟：
1. 首先，我好尷尬地走入去屈臣氏，同佢講我想交$0.06的3電話費，見到個職員面有難色，我話：“我交$0.1都ok架！”但佢都話收唔到$0.1電話費。
2. 我好不忿，交$0.1電話費你又唔收，唔交的話你又不停寄信來煩我，唯有打電話上客戶服務問下。但因為我已經同3停止合約，我的客戶號碼已失效，好不容易才從街線駁去客戶服務熱線，佢竟然答我：“這$0.06係要交架！你去我們的門市部試下啦。”
3. 於是，我又被點去門市部。個職員哥哥好好心，幫我左check右check，答案是：我們這裡最低收費都是$1，但PPS應該可以收$0.1或以下。
4. 最後一站，我回到家，係部電腦PPS的交付金額上填上：$0.06；它的回覆是：無法繳交$1以下的金額。我無奈，唯有改上$1，結束了這個噩夢。
關上電腦後，我發現以上所有步驟都做錯了，3憑什麼要多收我$0.94？牠平時多收我的錢不已經是$0.06的N倍了嗎？我根本就不應該再交$0.06。但怯弱的小市民無權無勢，抵受不住牠窮追不捨的騷擾，唯有乖乖被迫就範。不過和黃明明截至六月底，中期業績表現比市場預期好，期內純利按年增長23%，賺123.98億元（注），點解仲要同我呢啲搵朝唔得晚的小市民計果1仙幾毫？
一個月後，我收到3的賬單，話……我俾多左$0.94（見下圖）。小市民欠你$0.06就死都唔放過，那現在你欠我$0.94，我是否應該即刻衝上去淋你紅油？！！！我欠你$0.06就咁緊張即刻還，咁你又幾時還呀？btw 欠無數香港人的無限爛數又幾時還呀？？！！
注：東方日報,2013年8月2日
http://orientaldaily.on.cc/cnt/finance/20130802/00202_001.html
本文由自动聚合程序取自网络，内容和观点不代表数字时代立场
