2014-08-07
◎ 張復聚
語言是文化、人權、資源。
就頂面任何一點來講，台灣囡仔攏有資格得著完整的母語教育；這是現代社會的共識，嘛是聯合國的政策。
一九九九年咱要求教育部實行對國小一年到高中三年每禮拜兩點鐘的母語教學，當時教育部長楊朝祥答應先佇國小一年到六年每禮拜一點鐘，後面才閣調整。但是到二○一四年的今仔日，猶原一點仔攏無改善！
中小學本土語言教育經費也對二○○八年開始一直減少，到舊年偆二千六百萬！經過全國本土語文系所極力爭取，才閣回復到五千二百萬。這敢有kā台灣人「看做人」？
根據報紙消息，八月份「新課綱小組」按算欲kā「國中本土語文必修」刪除，雖然前任部長蔣偉寧一再拍胸坎保領欲通過！上好笑的是，真濟課綱委員反對的理由竟然是：過去國小母語教學做了無好、師資無夠額、教材無理想、教學效果不良…，所以反對國中繼續閣做！請問：政府進前投資佇「國語推行委員會」的經費有偌濟？這馬投資佇本土語文教育的資源閣是偌濟？對目前母語教學會敢當按呢比評？「跤頭污」想嘛知。
一九九九年聯合國教科文組織佇會員大會第十二號有決議教育應該採用「多語教育」，意思是講佇正式教育內底，上少使用三種語言：母語、地區或國家的官方語言佮一種國際性語言。阮真正希望政府會當理解、接受文明的說服！
（作者為台灣南社社長，高雄醫學大學台語文講師）
本文由自动聚合程序取自网络，内容和观点不代表数字时代立场
