唔識大陸政治嘅朋友，可能無聽過咩係「西奴吊架」，佢係一個共產黨內極左陣營設立的網站，叫《社會進步網》，估計是由重慶薄熙來放水搞的， 用意係打擊黨內外嘅自由派，標簽佢地做「西奴」，要放在「吊架」上，吊死佢地，成個中共 cross over 三K黨咁，好得人驚。薄熙來下台之後，網站誓死追隨，主要攻擊嘅對象變成影帝溫家寶及其代表的黨內自由派，為黨內極左及尚武勢力舖路。
日益「赤化」嘅香港，最近亦出現咗類似嘅網站 (anti-pd)，以反泛民同反法輪功為旗幟，成個網站的內容結構同《社會進步》網差唔多，最大的特色是作個人標簽，大陸版稱敵人為「西奴」，港版稱敵人為「漢奸人渣」，因為網站剛開，名單唔太長，包括有黃毓民、黎智英、王丹、黃之峰、陳雲、張漢賢（港獨組織者Dickson Cheung）
至於敵對勢力名單則列在（「反中亂港組織」）的頁面。除左支聯會、各泛民主派政黨之外，不少民間團體也榜上有名，包括香港記者協會、學民思潮、香港人權監察等等，連獨媒亦在名單之列，唔知八方幾時會被放在「漢奸人渣」列表上示眾呢？
除左敵人外，當然有友好名單，即（「愛國愛港組織」），土共如民建聯、工聯會等固然被視為友好，但中堅份子是一堆去年區議會選舉及梁振英上台後，由西環背後組織嘅撐政府「愛港」組織同埋前排用國術向社民連挑機嘅「東方體育會」。
睇嚟佢地會不時發起一啲如「反外傭居港權」式嘅「反泛民」民粹遊行。因為要發動民粹，佢地會貼好多反映社會不滿的新聞，如通賬、雙非、奶粉荒等，並將施政失效說成是泛民「政治化」和「亂港」。好明顯，上次反外傭居權成功喺區議會砌低公民黨，食過番尋味。佢地網頁仲開左個「反泛民活動」日曆，岩岩星期日壇銅鑼灣 banner 大戰當然係日曆入面啦。
網站底部的連結除咗強國軍事網站外，仲有大家熟識嘅「東方日報」同「文匯報」，網站「關於我們」更大幅引用咗文匯同東方日報嘅泛民起底報道，點解？八方建議大家可以睇番劉夢熊放《陽光時務》嘅訪問，睇下梁振英同邊個相識風雨中，對方如何承諾為梁振英「遮風擋雨」；仲有泛民作為「敵對勢力」而非「合作對象」之說，也一一應驗。
共產黨嘅五毛制度，係香港落地生根，似乎越來越明顯。法輪功因為首當其衝，成為狼英登位後第一個被暴力打壓的團體，佢地一早就警告大家，香港已經成為共產黨派系鬥爭嘅戰場，當中有咩派系？反法輪功 X 撐梁 X 尚武軍事，大家可以按此推敲一番。再且，一直以來，西環抱著「事事關心」的態度一手搞社團一手搞離間，最近又有「齊心基金」資助梁粉，類似 anti-pd 咁嘅網站，一定會搞完一個又一個。
唉，八方都係唔好評論咁多，費事好似《信報》老鍊咁，俾人發律師信啦，一陣搞到獨媒俾人揼多鑊，更是罪過。
圖：內地的「西奴吊架」《社會進步網》
本文由自动聚合程序取自网络，内容和观点不代表数字时代立场
